Íslenska bútasaumsfélagið

Aðalfundur og blómafundur 24. mars í Safnaðarheimili Fella- og Hólakirkju

Aðalfundur Íslenska bútasaumsfélagsins verður haldin 24. mars næstkomandi kl. 18.30 samkvæmt áður auglýstri dagskrá (sjá tilkynningu frá stjórninni frá 15 febrúar sl.).

Boðið verður upp á léttar veitingar að hætti Svölu.
 

Að aðalfundi loknum verður sýnt og sagt frá blómaverkum og eru félagsmenn hvattir til að koma með verk þar sem blóm eru í aðalhlutverki.

Stjórnin

Félagsfundur 24. febrúar kl 19.30.

Næstkomandi miðvikudagskvöld heimsækir myndlistakonan Gunnella okkur á félagsfund sem haldin verður í safnaðarheimili og  Fella- og Hólakirkju.  Hún hefur áhuga á samstarfi við handverksfólk sem væri tilbúið að koma myndmáli hennar í bútasaumi.  Nú fáum við tækifæri til þess að skiptast á hugmyndum og skoðunum.   Vonandi verður afrakstur þessa samstarfs sýndur á sýningum hérlendis og erlendis í framtíðinni.

Verk listakvennanna sem tóku þátt í samsýningu Röhsska hönnunarsafninu í Gautborg verða sýnd ásamt fleiri verkum.

Hlökkum til að sjá ykkur, stjórnin.

Aðalfundur - miðvikudagskvöldið 24. mars kl.18.30

Aðalfundur Íslenska bútasaumsfélagsins verður haldinn miðvikudagskvöldið 24. mars kl. 18.30 í Safnaðarheimil Fella- og Hólakirkju.   Rétt er að ítreka að aðalfundur verður haldinn í mars eins og stendur í dagskrá vetrarins í síðasta Fréttablaði félagsins en ekki í apríl eins og misritaðist í fundarboðinu í sama blaði.

Dagskrá:

1. Fundarsetning, kosning fundarstjórnar og fundarritara.
2. Skýrsla stjórnar um störf á liðnu ári.
3. Endurskoðaðir reikningar félagsins lagðir fram til samþykktar.
4. Tillaga um árgjald.
5. Skýrslur nefnda.
6. Lagabreytingar, enda hafi þær borist stjórn fyrir boðun aðalfundar.
7. Kostning formanns.
8. Kosning meðstjórnenda.
9. Kosning varamanna.
10. Kosning tveggja skoðunarmanna ársreikninga.
11. Kosning í nefndir.
12. Önnur mál.
13. Fundi slitið.

Samkvæmt lögum félagsins sem finna má hér á síðu félagsins er stjórn félagsins skipuð 7 aðilum sem kjörnir eru til tveggja ára í senn.   Því þarf að kjósa 4 aðila annað hvert ár eins og í ár.   Að auki þarf að kjósa varaformann vegna afsagnar hans fyrr í haust.

Fyrir hönd stjórnar, Erla Sigurðardóttir.

Heimsóknir Íslenska bútasaumsfélgsins á handverks- og prjónakaffi

Á næstu vikum munu félagsmenn Íslenska bútasaumsfélagsins heimsækja eftirfarandi handverks- og prjónakaffi:

• 23 febrúar - miðvikudagur. Handverkskaffi í Neskirkju.
• 3. mars - miðvikudagur. Handverkskaffi Gerðubergs.
• 4. mars - finntudagur. Handverkskaffi Heimilisiðnaðarfélag Íslands í Amokka Hlíðarsmára.

Vonumst við að þessar heimsóknir veiti fleirum innsýn í bútasaum og veki áhuga þeirra til að glíma við handverkið.

Afmælisteppi Íslenska bútasaumsfélagsins

Í haust fékk félagið batikefni að gjöf frá félagsmönnum sínum.   Í tilefni af 10 ára afmæli félagsins í ár var Afmælisteppi saumað af Margréti Árnadóttur og það stungið af Sæunni Thorarensen.  Fyrir 500 krónur er hægt að freista gæfunar og eiga möguleika á því að eignast þetta glæsilega teppi.   Hægt verður að taka þátt fram til 17. september næstkomandi og verða miðar í boði á öllum viðburðum félagsins fram að þeim tíma.   Einnig er hægt að hafa samband við gjaldkera félagsins sem bætir nafni ykkar í lukkupottin gegn greiðslu.

 

Opið bréf til félagsmanna Íslenska bútasaumsfélagsins

Ágætu félagsmenn.  Á liðnum árum hefur Íslenska bútasaumsfélagið tekið þátt í samstarfi norrænna bútasaumsfélaga sem efnir á þriggja ára fresti til hátíðar undir nafninu Nordisk Quilt Træf.   Markmið NQT er að skapa sameiginlegan vettvang fyrir sýningar félaganna, efna til samkeppni meðal félagsmanna sinna og miðla fræðslu til þátttakenda.  Að auki er ýmsum söluaðilum gefin kostur á að mæta og selja vörur og þjónustu.

Stjórn Íslenska bútasaumsfélagsins hefur tekið ákvörðun um að hætta þessu samstarfi við norrænu bútasaumsfélögin en fyrir því eru nokkrar ástæður;

• Aðeins lítil hluti félagsmanna Íslenska bútasaumsfélagsins hefur tök á því að taka þátt í NQT.
• Til þess að samstarfið sé mögulegt þarf félagið að hafa tvo starfandi fulltrúa sem bæði eru talandi og skrifandi á ensku og einu norðurlandamáli. Þeir verða að vera reiðubúnir til að starfa næstu sex árin.
• Viðburður sem þessi krefst mikilar vinnu fulltrúa aðildarfélaganna sem öll er unnin í sjálfboðavinnu.
• Samstarfið kallar á ferðalög á milli landa en árlega eru haldnir vinnufundir, en hvert félag greiðir útlagðan kostnað þegar hann fellur til.
• Til að standa straum af kostnaði allra norrænu félaganna við NQT er meðal annars efnti til happadrættis og þannig er stefnt að því að tekjur standi undir öllum kostnaði. Félagið hefði þurft að greiða kostnað vegna samstarfsins á næstu þremur árum áður en mögulegar tekjur skiluðu sér til baka.
• Samstarfsfundur fyrir næstu NQT hátíð verður haldi 16 október næstkomandi þar sem félögin skipta með sér verkum fyrir næstu misseri. Ekki þótti rétt að draga að taka ákvörðun um brotthvarf félagsins á þessum tímapunkt.

Til fróðleiks birtum við einnig bréf  sem sent var fulltrúum norrænu bútasaumsfélaganna.

Fyrir hönd stjórnar, Erla Sigurðardóttir, formaður.

Happdrættisteppi fyrir afmælishátið, saumað úr feitum fjórðungum

Fyrirhugað er að halda veglega uppá afmæli félagsins á næsta ári og er meðal annars stefnt að því að halda veglega sýningu.  Til þess að standa straum af kostnaði hefur verið ákveðið að selja happdrættismiða bæði fyrir sýningunna og á meðan henni stendur.   Vinningurinn verður bútasaumsteppi, en stjórninn mun fara þess á leit við hóp innan félagsins að sauma teppið.

Til að halda kostnaðinum í lágmarki, biðjum við félagsmenn að mæta með feitan fjórðung (Fat Quarter) á fundinn 30. september næstkomandi af batik efni sem verður notað til að sauma happdrættisteppið.  Batik efni eru þess eðlis að litirnir í þeim passa allir vel saman og því verður skemmtilleg áskorun að fyrir hópinn hanna mynstur og sauma teppi úr þeim efnum sem berast.

Þeir félagar sem ekki komast á fundinn eru beðnir að senda feitan fjórðung til undirritaðarar sem mun koma efnunum til happdrættishópsins.   Tekið verður á móti bútunum til 15 október.

Með kveðju, Borghildur.

 

Félagsfundur 30. september kl. 19.30

Félagsfundur30 september - Afmælisárið 2010.

• Kynning á dagskrá afmælisárs Íslenska bútasaumsfélagsins.
• Tækifæriskort, kynning á samkeppni og fræðsla um gerð þeirra.
• Happdrættisteppi og batikbútar.
• Kynning á bjálkakofa " Log cabin" samkeppni á jólafundi.
• Félagskona sýnir og segir frá verkum sínum.

Sjáumst hressar með handavinnuna okkar!  Stjórnin.

Fyrsti félagsfundur vetrarins

Félagsfundur Íslenska bútasaumsfélagsins verður haldinn miðvikudaginn 30. september næstkomandi kl. 19.30 í Safnaðarheimili Fella- og Hólakirkju (sjá kort ).  Fundarefni verður auglýst þegar nær dregur hér á síðunni.

Heimasíðan fær nýtt útlit

Velkomin á nýja heimasíðu Íslenska bútasaumsfélagsins.

Eins og hér sést hefur heimasíða félagsins fengið nýtt og breytt útlit.

Nokkrar ástæður eru fyrir því að ákveðið var að breyta síðunni. Í fyrsta lagi þótti síðan sem áður var í notkun nokkuð flókin í vinnslu en markmiðið er að þegar nýjir umsjónaraðilar taka við geti þeir/þær gert það á sem einfaldastan hátt. Stjórnkerfi þessarar síðu er mun einfaldara í notkun og minnir viðmót hennar, þegar unnið er við að setja inn nýtt efni, á Word umhverfið sem flestir þekkja vel.

Í öðru lagi er mun ódýrara fyrir félagið að halda úti nýju síðunni.

Í þriðja lagi þykir útlit þessarar síðu þægilegra til aflestrar og býður umhverfið upp á auðveldari og fjölbreyttari möguleika hvað það varðar, t.d. væri mjög einfalt að skella síðunni í jólabúning í desember!

Einhverjir taka þó sjálfsagt eftir því að nokkrir titlar á hliðarreitum eru á ensku en því er því miður ekki hægt að breyta, a.m.k. ekki strax. Við höfum sent fyrirspurn á fyrirtækið sem býður upp á umhverfið og er það á dagskrá hjá þeim að koma þessum fyrirsögnum inn á sem flestum tungumálum. Miðað við þægilegra viðmót og mun ódýrar viðhald ættum við að geta litið fram hjá þessu í bili :)

Það er von mín að þessi síða nýtist félagsmönnum, ekki síður en sú sem áður var í notkun.

Allar góðar hugmyndir, ábendingar og spurningar eru vel þegnar og má senda þær til mín á netfangið berglsn hja hotmail.com

Hugmyndin er að kynna síðuna formlega á næsta félagsfundi, þriðjudaginn 30. október 2007 í Fella- og Hólakirkju, kl. 20.00

Kær kveðja,
Berglind Snæland, vefstjóri